நகை அணிந்து இல்லறம்

என்னுடைய கேள்வி : பெண்கள் அணியும் கழுத்துச் செயினுக்கான டாலர் மற்றும் கை விரல்களின் மோதிரம் பிரேஸ்லெட் போன்ற தங்க நகைகளில் 'அல்லாஹ்' 'லாயிலாஹ இல்லல்லாஹ்' போன்ற வாசகங்களைப் பொறித்துக்கொள்கிறார்கள். இந்த வாக்கியங்களோடு கழிவறைக்குச் செல்வது - தாம்பத்திய உறவில் ஈடுபடுவது கூடுமா..?

Name: Syed Gnaniyar
email: syed.isc@.....
Location: jeddah
Subject: Kelvi

பொதுவாக நகைகளில் அல்லாஹ் முஹம்மத் போன்ற வாசகங்களைப் பொரித்துக் கொள்வதற்கு எந்த தடையுமில்லை. ஏனெனில் நபி(ஸல்) அவர்கள் தங்கள் மோதிரத்தில் அல்லாஹ் - முஹம்மத் - ரஸுல் ஆகிய வாசகங்களைப் பதித்திருந்தார்கள்.

அது அவர்களின் முத்திரை மோதிரமாக (பிற நாட்டு மன்னர்களுக்கு இஸ்லாமிய அழைப்பை வைத்து கடிதம் எழுதும் போது அந்த மோதிரத்தின் முத்திரையே கடிதத்தில் வைக்கப்படும்).

நபி(ஸல்) மோதிரம் அணியும் வழக்கமுள்ளவர்களாக இருந்தார்கள். ஆனால் அந்த மோதிரத்தை தம் தேவையை நிறைவேற்ற செல்லும் போது (கழிவறை போன்ற இடங்களுக்கு செல்லும் போது) கழற்றி விட்டு செல்வார்கள் என்று ஹதீஸ்கள் கிடைக்கின்றன.

‏حدثنا ‏ ‏نصر بن علي ‏ ‏عن ‏ ‏أبي علي الحنفي ‏ ‏عن ‏ ‏همام ‏ ‏عن ‏ ‏ابن جريج ‏ ‏عن ‏ ‏الزهري ‏ ‏عن ‏ ‏أنس ‏ ‏قال ‏

‏كان النبي ‏ ‏صلى الله عليه وسلم ‏ ‏إذا دخل الخلاء ‏ ‏وضع ‏ ‏خاتمه

இந்த செய்தி பற்றிய விபரங்களுக்கு கிளிக் செய்யுங்கள்

திர்மிதி - நஸயி - அபூதாவூத் - இப்னுமாஜா - ஹாக்கிம் உட்பட இந்த செய்தி இடம் பெறுகின்றது. (அனஸ் ரலி அறிவிக்கும் இந்த செய்தியை திர்மிதி அவர்கள் சரியானது என்று கூறினாலும் பிற அனைத்து ஹதீஸ் பதிவாளர்கள், ஹதீஸ் ஆய்வாளர்களும் அந்த செய்தியை பலவீனம் என்று கூறியுள்ளார்கள். (திர்மிதி இமாமின் ஆய்வில் தவறு நிகழ்ந்துள்ளது என்று புரிந்துக் கொள்ளலாம்.)

இது ஆதாரப்பூர்வமான செய்தியாக இருந்திருந்தால் இதை அடிப்படையாகக் கொண்டு மலஜலம் கழிக்கும் போது - இல்லறத்தில் ஈடுபடும் போது நீங்கள் குறிப்பிட்டுள்ள அந்த வாசகங்கள் பதிந்துள்ளவற்றை கழற்றி விட வேண்டும் என்று முடிவு செய்யலாம். செய்தி பலவீனமாக உள்ளதால் இதை வைத்து சட்டம் எடுக்க முடியவில்லை.

ஆனாலும் அதனால் மன ஊச்சலாட்டம் ஏற்படும் என்றால் கழற்றிக் கொள்ள வேண்டியதுதான். மன ஊச்சலாட்டங்களை விட்டு இஸ்லாம் பாதுகாப்பு தேட சொல்லியுள்ளது. நீங்கள் குறிப்பிட்டுள்ளது மன ஊச்சலாட்டத்தை ஏற்படுத்துவது என்பதால் அதை கழற்றி வைப்பதே பாதுகாப்புக்கு சமம் என்பதால் கழற்றி விடலாம். (அல்லாஹ் மிக்க அறிந்தவன்)

சிகப்பு ஆடை

ஆண்கள் சிகப்பு நிற ஆடை உடுத்த இஸ்லாத்தில் தடையுள்ளதா...?

Name: Fathima
email: fkathija@....
Location: Srilanka

ஆண்களுக்கும் பெண்களுக்கும் சரி உடையின் கலர்களைப் பொருத்தவரை உஸ்புர் (சாயம் ஏற்றப்பட்ட வெளிர் மஞ்சல் - காவிக் கலர்) என்பது மட்டும் தான் 'உடுத்த வேண்டாம்" என்று தடை செய்யப்பட்டுள்ளது. (திர்மிதி)

ஹஜ் - உம்ராவிற்காக இஹ்ராமில் இருக்கும் ஆண்களுக்கு பச்சை சாயம் ஏற்றப்பட்ட, குங்குமப்பூ சாயம் ஏற்றப்பட்ட, வர்ஸ் எனும் செடியின் சாயம் ஏற்றப்பட்ட உடைகளை உடுத்த தடை வந்துள்ளது. (இந்த செய்தியை புகாரியில் பல இடங்களில் பார்க்கலாம்)

இது தவிர கலரைப் பொருத்தவரை வேறெந்த தடையுமில்லை. ஆண்கள் சிகப்பு நிறந்தில் ஆடை அணியலாம் ஏனெனில் நபி(ஸல்) சிகப்பு ஆடை உடுத்தியுள்ளார்கள்.

பராஉ இப்னு ஆஸிப்(ரலி) அறிவித்தார்
நபி(ஸல்) அவர்கள் நடுத்தர உயரமுடையவர்களாகவும் (மேல் முதுகும் மார்பும் விசாலமான நிலையில்) இரண்டு புஜங்களுக்கிடையே அதிக இடைவெளி உள்ளவர்களாகவும் இருந்தார்கள். அவர்களின் தலைமுடி அவர்களின் காதுகளின் சோணையை எட்டும் அளவிற்கு இருந்தது. அவர்களை நான் சிவப்பு நிற அங்கி ஒன்றில் பார்த்திருக்கிறேன். அதை விட அழகான ஆடையை நான் கண்டதேயில்லை. (புகாரி)

முடிவெட்டும் தொழில்

இஸ்லாத்தில் முடிவெட்டும் தொழில் செய்பவர்களை மதிப்பதில்லையே ஏன்? அவர்கள் மோசமானவர்களா..? இவர்களைப் பற்றி இஸ்லாம் என்ன சொல்லியுள்ளது?

Name: b.sulaiman
email: sukasafa9@.....
Location: brunei தாருஸ்ஸலாம்

மனிதர்களுக்கு வாழ்வாதாரத்தை கொடுக்கும் ஆயிரக்கணக்கான தொழி்ல்களில் முடிவெட்டும் தொழிலும் ஒன்று. இது அனுமதிக்கப்பட்டத் தொழிலாகும்.

இந்தத் தொழில் செய்பவர்கள் உண்மையில் பிறரை விட ஆண்களுக்கு அதிக நன்மைச் செய்கிறார்கள். ஆம், மனிதனின் அழகைத் தீர்மானிப்பதில் முக்கியப்பங்கு வகிப்பது சிகையலங்காரமாகும். பரட்டைத் தலையுடன் அல்லது காடுபோன்ற வளர்ந்த தலைமுடியுடன் உலவும் எவரும் அவர் நல்ல உடை உடுத்தி இருந்தாலும் பிறர் முகத்தை சுளித்துதான் பார்ப்பார்கள். முடிவெட்டி தலையை ஒழுங்காக வைத்திருப்பவர்கள் அடுத்தவர் பார்வைக்கு சிறந்தவராகவே தெரிவார்.

மனிதனின் சமூக மதிப்பீட்டை உயர்த்தும் தொழிலான முடிவெட்டும் தொழிலை குறைத்து பார்ப்பது, அந்தத் தொழிலில் ஈடுபடுபவர்களை மதிக்காமல் இருப்பது அறிவீனத்தின் அடையாளமாகும்.

தினமும் நூறு முறை கண்ணாடி பார்த்து தலையை அலங்கரித்துக் கொள்பவர்கள் இரண்டு மூன்று மாதங்களுக்கு பார்பர்ஷாப் பக்கம் போகாமல் இருந்து விட்டு பிறகு கண்ணாடி பார்த்து தனது அழகை ரசிக்கட்டும் பிறகு தெரியும் அந்த தொழிலின் அருமையும் அந்த தொழிலாளியின் அருமையும்.

பொருளாதாரமே மதிப்பீடுகளை தீர்மானிக்கும் போக்கு வளர்ந்து விட்டதால் தான் முடிவெட்டும் தொழில், சலவைத்தொழில், செருப்பு தைக்கும் தொழில், - இதன் தொழிலாளிகள் பிறரால் மதிப்புடன் பார்க்கப்படுவதில்லை. காரணம் இவர்களின் தொழிலில் வருமானம் மிக மிக குறைவு. தொழிலின் பயன்பாட்டை வைத்து தொழிலாளிகள் மதிக்கப்பட்டால் மேற்குறிப்பிட்டவர்கள் முன்னணியில் நிற்பார்கள்.

இறைவன் அழகானவன் அவன் அழகை விரும்புகிறான் என்பது நபிமொழி (முஸ்லிம்) இந்த ஹதீஸ்படி பார்த்தால் அழகியலு்க்காக பாடுபடும் அனைவரும் இறைவனிடம் உயரந்தவர்கள் தான்.

மனிதன் உண்ணும் உணவிலேயே சிறந்தது அவன் கைகளால் உழைத்து உண்ணும் உணவாகும் என்று நபி(ஸல்) குறிப்பிட்டுள்ளார்கள் (புகாரி)

மோசடிப்பண்ணத் தெரியாத, நன்கொடை என்றப் பெயரில் லஞ்சம் பெறத் தெரியாத, பெரும் கூலிக்கு ஏற்ற தகுந்த பணியாற்றும் இவர்கள் சமுதாயத்தில் சிறந்தவர்கள். நிச்சயம் நாம் அவர்களை மதிக்க வேண்டும்.

நன்மையுண்டா இதுக்கு?

அஸ்ஸலாமு அலைக்கும்.
மாற்று மததத்தவர்களுக்கு தானதர்மம் செய்யலாமா.. அதனால் நமக்கு நன்மையுண்டா..? மாற்றுமதத்தவர்கள் தானதர்மம் செய்தால் அதனால் அவர்களுக்கு நன்மை கிடைக்குமா..? இறைவனை ஏற்காதவர்கள் நிரந்தர நரகில் இருப்பார்கள் என்று குர்ஆனில் சொல்லி இருக்கானே... எனக்கு பதில் தேவை!
Name: haja
email: haja.faisa@....
Location: kuwait

முஸ்லிம்கள் மனிதாபிமானத்திலும், பிறர் நலன் நாடுவதிலும் எப்போதும் முன்னணியில் இருக்க வேண்டும். பசித்தவர்களுக்கு உணவளிப்பது, ஏழைகளின் தேவைகளை நிறைவேற்றுவது போன்றவை முஸ்லிம்கள் முஸ்லிம்களுக்கு மட்டும் செய்ய வேண்டியவையல்ல.

பொருளாதாரத்தை பொருத்தவரை முஸ்லிம் முஸ்லிமுக்கு மட்டுமே செலவிட வேண்டும் என்ற எந்தக் கட்டளையையும் அல்லாஹ்வோ அல்லாஹ்வின் தூதரோ நமக்கு இடவில்லை.

ஜகாத்தை எடுத்துக் கொள்வோம். 8 கூட்டத்தாருக்கு அவை பயன்பட வேண்டும்.

ஜகாத் என்னும்) தானங்கள் தரித்திரர்களுக்கும், ஏழைகளுக்கும், தானத்தை வசூல் செய்யும் ஊழியர்களுக்கும், இஸ்லாத்தின் பால் அவர்கள் உள்ளங்கள் ஈர்க்கப்படுவதற்காகவும், அடிமைகளை விடுதலை செய்வதற்காகவும், கடன் பட்டிருப்பவர்களுக்கும், அல்லாஹ்வின் பாதையில் (போர் புரிவோருக்கும்) வழிப்போக்கர்களுக்குமே உரியவை. (இது) அல்லாஹ் விதித்த கடமையாகும் - அல்லாஹ் (யாவும்) அறிபவன், மிக்க ஞானமுடையோன். (அல் குர்ஆன் 9:60)

இந்த எட்டுக் கூட்டத்தாரில் "அல்லாஹ்வின் பாதையில் போர் புரியும் ராணுவவீரர்" தவிர மற்ற ஏழு கூட்டத்தார்கள் பொதுவானவர்கள். அவர்கள் முஸ்லிம்களாகவும் இருக்கலாம், பிறராகவும் இருக்கலாம். தேவையை பார்த்து அவர்களுக்கு ஜகாத் தொகையை வழங்குவதில் தவறில்லை.

கஷ்டத்திலிருப்பவர்களுக்கு பொருளாதர உதவி செய்து அவர்களை அதிலிருந்து மீட்டால் அவர்கள் இஸ்லாத்தை புரிந்து அவர்கள் இஸ்லாத்தை ஏற்கும் நிலையும் ஏற்படலாம் என்பதை ஒரு பகுதியாகவே இறைவன் ஜகாத் திட்டத்தில் வைத்துள்ளான்.

எனவே முஸ்லிமல்லாதவர்களுக்கு நமது பொருளாதாரத்தை செலவிடக் கூடாது என்று எந்தத் தடையுமில்லை.

நாம் செய்யும் எந்த நல்லமலையும் இறைவன் வீணாக்கி விடமாட்டான் என்று குர்ஆனில் இறைவன் குறிப்பிட்டு காட்டுவதால் பகட்டுக்காக இல்லாமல் இறை திருப்தியை நாடி நாம் முஸ்லிமல்லாதவர்களுக்கு நமது பொருளாதாரத்தை செலவழிக்கலாம்.

தேவையிருந்தும் செலவு செய்யதவர்களுக்குரிய எச்சரிக்கையும் குர்ஆனில் உள்ளது.

وَأَنْفِقُوا مِنْ مَا رَزَقْنَاكُمْ مِنْ قَبْلِ أَنْ يَأْتِيَ أَحَدَكُمُ الْمَوْتُ فَيَقُولَ رَبِّ لَوْلَا أَخَّرْتَنِي إِلَى أَجَلٍ قَرِيبٍ فَأَصَّدَّقَ وَأَكُنْ مِنَ الصَّالِحِينَ

உங்களில் ஒருவருக்கு மரணம் வருமுன்னரே, நாம் உங்களுக்கு அளித்த பொருளிலிருந்து, தான தர்மம் செய்து கொள்ளுங்கள், (அவ்வாறு செய்யாது மரணிக்கும் சமயம்); "என் இறைவனே! என் தவணையை எனக்கு சிறிது பிற்படுத்தக் கூடாதா? அப்படியாயின் நானும் தான தர்மம் செய்து ஸாலிஹான (நல்ல)வர்களில் ஒருவனாக ஆகிவிடுவேனே" என்று கூறுவான். (அல்குர்ஆன் 63:10)

தேவை இருந்தும் தான தர்மம் செய்யாமல் கைகளை இறுக்கிக் கொள்பவர்களின் மரணத் தருவாயின் புலம்பலை இறைவன் முன் கூட்டியே சுட்டிக் காட்டுகிறான். ஆனால் அந்த புலம்பலால் எந்தப் பலனும் இல்லை.
பிற மதத்தவர்கள் தான தர்மம் செய்கின்றார்கள் அதற்கு பலனுண்டா என்று கேட்டுள்ளீர்கள்.

இஸ்லாத்தைப் பொருத்தவரை ஓரிறைக் கொள்கையைத் தழுவிதான் மற்ற அனைத்து நற்பணிகளும் தீர்மானிக்கப்பட்டுளளன. ஓரிரைக் கொள்கையை ஏற்காத நிலையில் செய்யப்படும் நற்பணிகளுக்கு இஸ்லாத்தில் மதிப்பில்லை.

பிறராக முன் வந்து இஸ்லாமிய நற்பணிகளுக்கு உதவினால் அந்த உதவியை புறக்கணிக்க வேண்டும் என்றும் இஸ்லாம் சொல்லவில்லை. அது அவர்களின் விருப்பத்தை சார்ந்ததாகும்.

யாருக்கு சொத்து?

நான் இறந்த பின் எனது சொத்துக்களை (வங்கி இருப்பு, சொத்துக்கள், மரணக்காப்பீடு) இது போன்றவற்றை நான் என் மனைவிக்கும் என் சகோதரிக்கும் கொடுக்கலாமா? எவ்வாறு செய்வது? சிலர் கூறுகிறார்கள் இஸ்லாத்தில் இது அனுமதியில்லையென்று. நான் அவற்றை ஒருவருக்கே கொடுக்க மணமில்லை. தங்களிடமிருந்து தெளிவான பதில் தேவை.

Name: Mohamed Ibrahim
email: ibrm@.....
Location: Dubai
.....................................

எந்த ஒரு முஸ்லிமும் தான் இறந்த பிறகு தனது சொத்தை இந்த வகையில் பிரிக்க வேண்டும் என்று சொல்லிவிட்டு செல்ல முடியாது. சொத்துக்கு யாரெல்லாம் வாரிசுதாரர்களாவார்களோ அவர்களையும் அவர்களுக்குரிய அளவையும் இறைவன் தெளிவாக பட்டியலிட்டு விட்டதால் அவர்களுக்கு நாம் உயில் எழுதி வைக்க முடியாது. எழுதி வைத்தாலும் இஸ்லாமிய நீதிமன்றங்களில் அவை செல்லாது.

ஒருவர் இறந்த பின் அவரது வாரிசுதாரர்கள் யார் யார் என்பதை குர்ஆன் அடிப்படையில் நீதிமன்றம் அணுகி அவர்களுக்கு பிரித்துக் கொடுக்கும். (அதாவது பிரச்சனைகள் ஏற்பட்டால்).

பாகப்பிரிவினைப் பற்றிய வசனங்களைப் படியுங்கள்.

உங்கள் மக்களில் ஓர் ஆணுக்கு, இரண்டு பெண்களுக்குக் கிடைக்கும் பங்குபோன்றது கிடைக்கும் என்று அல்லாஹ் உங்களுக்கு உபதேசிக்கின்றான். பெண்கள் மட்டும் இருந்து அவர்கள் இரண்டு அல்லது அதற்கு மேற்பட்டிருந்தால் அவர்களுக்கு இறந்து போனவர்விட்டுச் சென்றதில் மூன்றில் இரண்டு பாகம் கிடைக்கும். ஆனால் ஒரே பெண்ணாக இருந்தால் அவள் பங்கு பாதியாகும்; இறந்தவருக்கு குழந்தை இருக்குமானால் இறந்தவர் விட்டுச் சென்றதில் ஆறில் ஒரு பாகம் (அவரது) பெற்றோர் ஒவ்வொருவருக்கும் உண்டு. ஆனால் இறந்தவருக்கு குழந்தை இல்லாதிருந்து பெற்றோர் மாத்திரமே வாரிசாக இருந்தால் அவர் தாய்க்கு மூன்றில் ஒரு பாகம் (மீதி தந்தைக்கு உரியதாகும்). இறந்தவருக்கு சகோதரர்கள் இருந்தால் அவர் தாய்க்கு ஆறில் ஒரு பாகம் தான் (மீதி தந்தைக்கு சேரும்). இவ்வாறு பிரித்துக் கொடுப்பது அவர் செய்துள்ள மரண சாஸனத்தையும், கடனையும் நிரைவேற்றிய பின்னர்தான்;. உங்கள் பெற்றோர்களும், குழந்தைகளும் - இவர்களில் யார் நன்மை பயப்பதில் உங்களுக்கு நெருக்கமாக இருப்பவர்கள் என்று நீங்கள் அறிய மாட்டீர்கள்;. ஆகையினால் (இந்த பாகப்பிரிவினை) அல்லாஹ்விடமிருந்து வந்த கட்டளையாகும்;. நிச்சயமாக அல்லாஹ் (யாவற்றையும்) நன்கறிந்தவனாகவும் மிக்க ஞானமுடையவனாகவும் இருக்கின்றான். (அல்குர்ஆன்:4:11)

இறந்துப் போனவர் விட்டு சென்றது என்று இறைவன் சுட்டிக் காட்டுவதை நாம் கவனிக்க வேண்டும். விட்டு செல்லக் கூடிய சொத்து எதுவாக இருந்தாலும் - நிலங்கள், பத்திரங்கள், வீடுகள், வருமானம் வரும் பிற கட்டிடங்கள், வங்கி வைப்புகள் உட்பட - அனைத்துக்கும் இறைவன் மேலே குறிப்பிட்டுள்ள அவர்கள் வாரிசுதாரராகி விடுவார்கள்.

இவர்களல்லாத பிறருக்கு வேண்டுமானால் 'மரணசாசனம்' எழுதி செல்லலாம். உண்மையில் உங்கள் சொத்தை பிறருக்கு ஓரளவு கொடுக்க வேண்டு்ம் என்று நீங்கள் விரும்பினால் அதை நீங்கள் உயிருடன் இருக்கும் போதே எழுதி அவர்களிடம் ஒப்படைத்து விட வேண்டும். அதாவது அது அவர்களின் சொத்தாகி விட வேண்டும்.

விபரம் போதவில்லையென்றால் எழுதுங்கள்.

வங்கி - எதிரி

வங்கி - வட்டி - எதிரி

முஸ்லிம்களை கருவறுப்பதற்கும் - முஸ்லிம் பெண்களை எழுத கூசும் விதத்தில் படு கேவலமாக மானப்பங்கப்படுத்தி கொலை செய்வதற்கும் வங்கி வட்டி பணம் தான் பயன்படுத்தபடுகிறது என்பதற்கு ஏதாவது தகுந்த ஆதாரம் உண்டா? நம்முடைய மக்களுக்கு புரியவைப்பதற்காக இதைவிளக்கவும் விளக்கவும்....

Name: Thajudeen
email: m.thajudeen@....
Location: Dubai
Subject: Question

சின்ன - பெரிய ஷிர்க்

எனது கேள்வி.
சின்ன ஷிர்க் என்றால் என்ன? பெரிய ஷிர்க் என்றால் என்ன? இரண்டுக்கும் உள்ள வேறுபாடு என்ன?

Name: ansar a rahman
email: abdul.ansar@......
Location: sri lankan
Subject: Kelvi

இணைவைப்பு என்ற ரூபத்தில் வந்தாலும் அது கொடியதாகும். இணைவைப்பு குறித்து முஸ்லிம்கள் மிகுந்த எச்சரிக்கையுணர்வுடனும், அதன் விளைவுகள் குறித்த அறிவு - பயத்துடனும் இருக்க வேண்டும்.

பெரிய இணைவைப்பு.

பகிரங்கமாக, வெளிப்படையாக, அறிந்தோ அறியாமலோ செய்யும் சில காரியங்கள்.
இறைவனைத் தவிர பிற அவனது படைப்புகளை அல்லது இறைவனுடன் அவனது படைப்புகளை வழிபாட்டுக்குரியதாக - வணக்கத்துக்குரியதாக ஆக்கிக் கொள்வது.
மனிதர்கள் (அது இறைவனால் தேர்ந்தெடுக்கப்பட்ட இறைத்தூதர்களாக இருந்தாலும் சரியே).
வானவர்கள் (மலக்குகள்),
ஜின்கள், (தேவதைகள்)
சிலைகள் (அது கடவுள் என்ற அர்த்தத்தில் வடிவமைக்கப்பட்டிருந்தாலும் சரி, மரியாதைக்காக வடிவமைக்கப்பட்டிருந்தாலும் சரி)
மிருகங்கள், பசு வழிபாடு போன்றவை
இடங்கள் (பூமியின் பல்வேறு இடங்கள் புனிதமாக கருதப்படுவது - பூமித்தாய் என்று போற்றி அதை வணங்குவது)
மனிதப்படைப்புகள் (ஆயுதபூஜை போன்றவை)
சமாதிகள், தர்காக்கள், மடங்கள்

இப்படி வெளிப்படையாக வழிபடப்படும் அனைத்தும் 'பெரிய இணைவைப்பு' என்ற கொடிய செயலில் அடங்கி விடும். இது 'லாஇலாஹ இல்லல்லாஹ்' 'வணக்கத்துக்குரியவன் ஏகனைத் தவிர வேறொன்றும் இல்லை' என்ற இஸ்லாத்தின் ஆணிவேரான கொள்கைக்கு முற்றிலும் மாற்றமானதாகும். இறைவனால் தேர்ந்தெடுக்கப்பட்டு அனுப்பப்பட்ட இறைத்தூதர்கள் அனைவரும் இந்த கொடிய செயலுக்கு எதிராகவே தனது முதல் பிரச்சாரத்தை துவக்கினார்கள். இந்த இணைவைப்பு குறித்து போதுமான விளக்கங்கள் பல வழிகளில் மக்களுக்கு எடுத்து சொல்லப்பட்டு வருகின்றன.

சிறிய இணைவைப்பு

முஸ்லிம்கள் அதிகமாக அஞ்சி தன்னைத் தானே பாதுகாத்துக் கொள்ளும் செயலாகும். அரபியில் 'ரியா' என்று குறிப்பிடப்படும் சிறிய இணைவைப்பு குறித்து நபி(ஸல்) மிகுந்த எச்சரிக்கையுணர்வை ஊட்டி சென்றுள்ளார்கள்.

எங்கள் மத்தியில் இறைவனின் தூதர் அவர்கள் உரையாற்றினார்கள். அப்போது, அவர்கள் 'மறைவான இணைவைப்பு குறித்து அச்சம் கொள்ளுங்கள். ஏனெனில் அது எறும்பு ஊர்ந்து செல்வதை விட கண்ணுக்கு புலப்படாத வகையில் அமைந்துள்ளது" என்று கூறினார்கள். அப்போது ஒருவர் (எழுந்து) 'அல்லாஹ்வின் தூதரே, எறும்பு ஊர்ந்து செல்வதை விட மறைவாக இருக்கும் அதனை நாங்கள் எப்படி தவிர்த்துக் கொள்ள முடியும்?" என்று வினவினார்கள். அப்போது நபி அவர்கள், 'அல்லாஹ்வே! நாங்கள் அறியாது செய்யும் இணைவைப்பிலிருந்து உன்னிடம் பாவமன்னிப்புக் கோருகிறோம்" என்று (பிரார்த்தனை செய் என்று) சொன்னார்கள். அபூமூஸா அல் அஷ்அரி (ரலி) அஹ்மத்.

'அல்லாஹ்விற்காக என்ற நோக்கத்துடன் மட்டும் பெற வேண்டிய அறிவை இவ்வுலகில் அதனால் பயன் கிடைக்கட்டும் என்ற நோக்கத்தில் ஒருவர், கற்பாரேயானால், அவர் இறுதித் தீர்ப்பு நாளில் சுவனத்தின் வாடையைக் கூட நுகர மாட்டார். என்று நபி(ஸல்) எச்சரித்துள்ளார்கள்.அபூதாவூத், இப்னு மாஜா.

'நாங்கள் தஜ்ஜாலைப் பற்றிப் பேசிக் கொண்டிருந்த போது, எங்களிடையே அல்லாஹ்வின் தூதர் வந்தார்கள். தஜ்ஜாலினால் விளையும் அபாயங்களை விட அதிகமாக நான் உங்கள் விஷயத்தில் அஞ்சுவது குறித்து தெரிவிக்கவா? அது மறைவான ஷிர்க் (இணைவைப்பாகும்.) ஒரு மனிதர் தொழுகைக்காக எழுகின்றார். மனிதர்கள் தன்னை உற்று நோக்குகின்றார்கள் என்பதற்காக அவர் தனது தொழுகையை அலங்கரித்துக் கொள்கிறார்." என்று கூறினார்கள். அபூஸயீத்(ரலி) இப்னுமாஜா.

அவசர உலகத்தை விரும்புவோருக்கு நாம் விரும்பியதை நாம் விரும்பியோருக்கு அவசரமாகக் கொடுத்து விடுவோம். பின்னர் அவருக்காக நரகத்தைத் தயார்படுத்துவோம். இழிந்தவராகவும் அருளுக்கு அப்பாற்பட்டவராகவும் அதில் அவர் நுழைவார்.

நம்பிக்கை கொண்ட நிலையில் மறுமையை விரும்பி அதற்காக முயற்சிப்போரின் முயற்சிக்கு, கூலி கொடுக்கப்படும்। அல்குர்ஆன் 17:18-19

உங்களில் அழகிய செயலுக்குாியவர் யார் என்பதைச் சோதிப்பதற்காக மரணத்தையும் வாழ்வையும் அவன் படைத்தான். அவன் மிகைத்தோன், மன்னிப்போன். (திருக்குர்ஆன் 67:2)

பேருக்காக, புகழுக்காக, பிறர் பார்க்க வேண்டும் என்பதற்காக, இன்னபிற உலக அற்ப நோக்கங்களுக்காக செய்யப்படும் எந்த காரியமும் - அமலும் - சிறிய இணைவைப்பு என்ற அந்த பாவத்தை ஏற்படுத்தி விடும்.

முஸ்லிமின் நோக்கம் மறுமையாக இருக்க வேண்டும். உலகின் எந்த நோக்கத்தையும் பிரதானமாக கருதாமல் மறுமைக்காக வாழும் வாழ்க்கை ஒன்றே சிறிய இணைவைப்பிலிருந்து நம்மை பாதுகாக்கும்.

இறைவன் நம் எண்ணங்களை தூய்மையாக்கி வைப்பானாக.

மதுவும் - வட்டியும்

1. என்னுடைய முதலாளி வட்டி வாங்குகிறர் நான் அவரிடம் வேலை செய்யலாமா? மற்றும் அவர் இன்னும் பிற தவறான செயல்களை செய்கின்றர்கள் என்று உடன் வேலை செய்பவர்கள் கூறுகிறர்கள் அதனை ஈர்ர்கலாமா?

2. என்னுடன் வேலை செய்பவர்கள் அனைவரும் ஒர் வீட்டில் இருந்து வருகிறோம். வேலை செய்யும் நபர்கள் மது அருந்தும் வழுக்கம் உள்ளவர்கள் மாதத்தின் கடைசியில் அந்த தேவைக்காக பணம் கேட்கிறார்கள் கொடுக்கலாமா? இந்த இரண்டு கேள்வி பதில் தருமாறு கேட்டுக் கொள்கிறேன்.

Name: Thahir
email: thahirmd53...
Location: India
Subject: Kelvi
...........................

வட்டிக்கடை நடத்துபவராக இருந்தால் நீங்கள் பிற வேலையைத் தேடிக் கொள்வதுதான் நல்லது. ஏனெனில் வட்டிக்கு எதிரான கடுமையான எச்சரிக்கைகள் இருப்பதால் அந்தப்பக்கத்தை விட்டு நாம் ஒதுங்கிக் கொள்வதுதான் நல்லது. வட்டி வாங்குபவர் என்பதை எந்த அர்த்தத்தில் குறிப்பிட்டுள்ளீர்கள் என்று புரியவில்லை. வங்கியில் கணக்கு வைத்துள்ள அநேகர் கூட வட்டி வாங்கத்தான் செய்கிறார்கள். அந்த அர்த்தத்தில் குறிப்பிட்டால் இன்றைக்கு உலகில் பெரும்பாலான இடங்களில் - நாடுகளில் -வேலை செய்யவே முடியாது ஏனெனில் அனைத்து தொழில் நிறுவனங்களும் வங்கியோடு தொடர்பில் தான் இருக்கின்றன.

வங்கியோடு தொடர்பில் இருக்கும் நிறுவனத்தில் வேலை செய்யலாமா என்றால் இது குறித்து ஏற்கனவே விளக்கியுள்ளோம். அத்தகைய இடங்களில் வேலை செய்வதால் நாம் குற்றவாளியாக மாட்டோம்.

உங்கள் முதலாளி தவறான செயல் செய்கிறார் என்று பிறர் கூறுவதை அலட்சியப்படுத்துங்கள். நீங்கள் நேரடியாக காணும் வரை பிற செய்திகளை முழுமையாக அலசி தெளிவு பெறாதவரை யாரைப் பற்றியும் தப்பெண்ணம் கொள்வதை கட்டாயம் தவிர்க்க வேண்டும். ஏனெனில் சில தவறான எண்ணங்கள் பாவமாகி விடும் என்று குர்ஆன் எச்சரிக்கின்றது.

உடனிருப்பவர்கள் ஹராமான காரியத்தை செய்வதற்கு உங்கள் உதவியை நாடினால் - பணம் மட்டுமல்ல கடையில் போய் மது வாங்கி வர சொன்னாலும் - அதற்கு உடன்படாதீர்கள்.

முஸ்லிம்கள் தீமைகளை பலவழிகளில் தடுக்கக்கடமைப்பட்டவர்கள். தடுக்க முடியாத பலவீனமான நிலை நம்மிடம் இருந்தால் குறைந்த பட்சம் உதவி செய்வதிலிருந்து தவிர்ந்து கொள்ள வேண்டும்.

நன்மையிலும், பயபக்தியிலும் நீங்கள் ஒருவருக்கொருவர் உதவி செய்து கொள்ளுங்கள், பாவத்திலும், பகைமையிலும் நீங்கள் ஒருவருக்கொருவர் உதவி செய்து கொள்ள வேண்டாம், அல்லாஹ்வுக்கே பயப்படுங்கள் (அல்குர்ஆன்: 5:2)

உடனிருப்பவர்களிடம் நளினமாக 'தனக்கு இதில் உடன்பாடில்லை, என் மார்க்கம் இதை தடுக்கின்றது" என்று கூறிவிடுங்கள். உடனிருப்பதால் அவர்களால் உங்கள் உணர்வுகளைப் புரிந்துக் கொள்ள முடியும். இறைவனின் உதவியை நாடுங்கள். பாவத்துக்கு துணைப் போக வேண்டாம்.

ஸ்பிரே சென்ட்

நாம் உபயோகிக்கும் வாசனைத் திரவியங்களில் குறிப்பாக ஸ்பிரே சென்ட் போன்றவற்றிலும் சமையலில் உபயோகப்படும் வினிகர் போன்றவற்றிலும் ஆல்கஹால் கலந்திருப்பதாக சொல்கிறார்கள் எனவே இவற்றை நாம் உபயோகப்படுத்தலாமா?

Name: அப்துஸ்ஸலாம்
email: masdooka@.....
Location: சவூதி அரேபியா
Subject: Kelvi

........................

ஆல்கஹால் என்பது இரண்டு வகையானது. எத்தில் ஆல்கஹால், மெத்தில் ஆல்கஹால் என்று அவற்றை வகைப்படுத்துகின்றனர். இதில் மெத்தில் ஆல்கஹால் போதைத் தரக்கூடியது. இந்த ஆல்கஹாலைத்தான் ஸ்ப்ரே சென்ட் உட்பட பல்வேறு மருந்து மாத்திரைகளிலும் தேவைக்கேற்ப கூடுதல், குறைவாக பயன்படுத்துகிறார்கள்.

சிலர் ஸ்பிரே சென்ட் பயன்படுத்தும் போது தும்மல் போன்ற அலர்ஜிக்கு ஆட்படுவதற்கு அதில் கலக்கப்பட்டுள்ள ஆல்கஹாலே காரணமாகும். வீடுகளில் வாசனைக்காக உபயோகிக்கப்படும் ஸ்பிரேக்களிலும் இந்தக் கலவை உள்ளது.

ஆல்கஹால் என்ற போதைப் பொருள் கலக்கப்பட்டுள்ளது என்று தெரிந்த நிலையில் அத்தகைய ஸ்பிரேக்களை பயன்படுத்தலாமா என்பது நமக்கு எழும் கேள்வி.

'போதை தரும் ஒவ்வொரு பானமும் விலக்கப்பட்டதாகும்' என்று இறைத்தூதர்(ஸல்) அவர்கள் கூறினார்கள்" என ஆயிஷா(ரலி) அறிவிக்கிறார்கள்.

பாகம் 4, அத்தியாயம் 64, எண் 4343,பாகம் 4, அத்தியாயம் 64, எண் 4344,பாகம் 6, அத்தியாயம் 74, எண் 5586.

நபி(ஸல்) காலத்தில் வாசனைத் திரவியமாக இத்தகைய போதைப் பொருள்கள் கலக்கப்பட்ட எதுவொன்றும் இருந்ததில்லை. எனவே உபயோகித்தால் போதைத் தரக் கூடிய - போதைத் தர வாய்ப்பிருக்கும் பொருட்களை பயன்படுத்துவதையே நேரடியாக அந்த ஹதீஸ்கள் தடுக்கின்றன. எந்த ஒரு பொருளும் அதன் தன்மையை இழந்து விடும் போது நேரடியானத் தடைகளை அந்த பொருளுக்கு பொருத்திப் பார்க்க முடியாது.

ஆண்களுக்கு தங்கம் ஹராம் என்பது நமக்கு தெரியும். ஆனால் தங்கம் பிற உலோகங்களோடு கலந்து தங்கத்தின் அளவு குறைந்து பிற உலோகங்களில் அளவு அதில் அதிகமாக இருந்தால் தங்கம் தடை என்ற குறிப்பிட்ட செய்தியை எடுத்துக்காட்டி மற்ற உலோகங்களின் கலவையையும் நாம் தடுக்க முடியாது.

அதேபோன்று, ஸ்பிரே சென்ட்களில் ஆல்கஹாலை விட பிற திவரங்கள் அதிகமிருக்கின்றன. மருந்துகளில் பிற மருத்துவ குணங்களோடு ஒப்பிடும் போது ஆல்கஹால் குறைவாக இருக்கும். போதையே ஏற்படாத அளவிற்கு பிற கலவிகள் இருந்தால் அதை பயன்படுத்துவதை தடுக்க முடியாது. அந்த வகையில் ஸ்பிரே சென்ட்களை உபயோகிக்கலாம்.

இதை பயன்படுத்தும் போதும் அலர்ஜி போதை போன்ற நிலையை உணர்ந்தால் அவர்கள் இவற்றைத் தவிர்த்துக் கொள்ள வேண்டும்.

இறைவன் மிக்க அறிந்தவன்.

இஸ்லாமிய திருமணம் எப்படி?

இஸ்லாமிய திருமணத்தைப்பற்றி தெளிவாக விளக்கவும். இன்று நடக்கக்கூடிய திருமணங்கள் இஸ்லாமிய சிந்தனையற்றதாகவே இருக்கின்றது. பிரமாண்டமாக நடக்கின்றது. மணமக்களை வாயில் சீனி (சர்க்கரை) கொட்டும் நிகழ்ச்சிகள் நடக்கின்றன. தங்களது தெளிவான விளக்கம் தேவை.

Name: Deen
email: rilvan0030@.....
Location: Malaysia
Subject: Question
.............................

இஸ்லாமிய திருமணம் பற்றி விரிவான தகவல் அறிய செல்லுங்கள்.

பிஜெ

சகோதரர் பிஜே அவர்களைப் பற்றிக் கேள்விப் பட்டிருக்கேன். அவர் சொல்லும் சில கருத்துக்களை சில காலங்களுக்குப் பிறகு வாபஸ் வாங்கி்க் கொள்கிறார். அப்படி இருக்கும் போது தற்போது அவர் கூறும் கருத்துக்களை எவ்வாறு நம்புவது?

Name: Mohamed Yaseer
email: awm.yaseer@....
Location: Doha Qatar
Subject: kelvi

தாம் செய்யும் அல்லது தாம் கூறும் ஒரு கருத்து தவறு என்று தெளிவாகும் போது தனது முந்தையக் கருத்தை மாற்றிக் கொள்வது தான் நல்லப் பண்பு. அப்படிப்பட்டவர்களிடம் தான் நியாயமிருக்க முடியும். முதலில் ஒன்றைச் சொல்லி விட்டு பிறகு அதை மாற்றிச் சொல்வது என்பது இன்றைக்கல்ல இஸ்லாமிய அறிஞர்களின் வரலாற்றில் காலந்தோரும் நடக்கக் கூடிய ஒன்றாகும். இதில் மிக பிரபல்யமானது அறிஞர் ஷாஃபி இமாம் அவர்களின் 'கவ்ல் கதீம்' 'கவ்ல்ஜதீத்' என்றத் தொகுப்பாகும்.

தமக்கு முன்னர் கிடைத்தவற்றை வைத்து அவர்கள் வெளியிட்ட, மக்களிடம் சொன்ன கருத்துக்கள் பிறகு அதற்கு மாற்றமான ஆதாரம் கிடைக்கும் போது ஆதாரத்துக்கு முக்கியத்துவம் கொடுத்து தனது முந்தையக் கருத்தை வாபஸ் வாங்கியது என்று அவர்கள் குறிப்பிடுவதை இதற்கு உதாரணமாகக் கொள்ளலாம்.

நாம் ஒரு கருத்தை வெளியிடுகிறோம், அதற்கு மாற்றமான ஒரு தெளிவான ஆதாரம் கிடைக்கின்றது என்றால் ஆதாரத்துக்கே முதலுரிமைக் கொடுத்து நம் கருத்தை பின்னுக்குத் தள்ளி விட வேண்டும். ஆனால் சில முரட்டு அறிஞர்களிடம் இந்தப் பண்பு இருப்பதில்லை. தாம் வெளியிட்ட கருத்தை எப்படியாவது சுற்றி வளைத்து நியாயப்படுத்தத்தான் முயல்கிறார்களேத் தவிர இறைவனின் மார்க்கத்தில் நம் சுய கருத்துக்கு இடமிருக்கக் முடியாது என்பதை ஒப்புக் கொள்ள மறுக்கிறார்கள்.

தர்கா வழிபாடு, தரீக்கா வழிபாடு, தனிமனித வழிபாடு, இயக்க வழிபாடு என்று எல்லா வழிபாடுகளுக்கும் இந்த மனநிலையே காரணமாகும்.

முந்தைய கருத்தை மாற்றும் போது அக்கருத்தை நம்பியவர்களின் நிலை என்னவென்ற சிந்தனை என்றக் கேள்விக்கு பதில் மிகவும் எளிது.

முந்தையக் கருத்தும் ஒரு ஆதாரத்தின் மீதே அமைந்ததாக இருந்தால் அக்கருத்தை அன்றைக்கு ஏற்றுக் கொண்டவர்கள் சரியானதையே செய்துள்ளார்கள் என்று பொருள். அதற்கு மாற்றமான வேறொரு ஆதாரம் கிடைக்கும் போது முந்தைய ஆதாரம் தளர்த்தப்பட வேண்டும். பிடிவாதம் பிடிப்பது நம்மை வேறு திசையில் திருப்பி விடும்.

பிஜே தன் கருத்தை மாற்றிக் கொள்கிறாரா...!

சந்தோஷம் தான்

மோதிரம் அணியும் விரல்

அஸ்ஸலாமு அலைக்கும் (வரஹ்...)மோதிரத்தை நடுவிரல் மற்றும் ஆள் காட்டி விரலில் அணியக்கூடாது என்று சமீபத்தில் ஒர் இதழில் படித்ததாக நண்பர் எங்களிடம் கருத்துக்களை பகிர்ந்து கொள்ளும் பொழுது கூறினார்.இதற்கு ஆதாரம் உள்ளதா? மோதிரத்தை எப்படி அணிய வேண்டும் தயவு செய்து விளக்கம் தாருங்கள்.

Name: Jageer
email: jageer.ali@.......
Location: UAE S
ubject: Kelvi
.......................

அடிக்கடி சிறுநீர் தொந்தரவு

அடிக்கடி சிறுநீர் ஒழுகும் நபர் என்ன செய்ய வேண்டும். திரும்ப திரும்ப ஒளு செய்ய வேண்டுமா..?

Name: mussafireen
email: mussafireen@......
Location: sri lanka
Subject: Kelvi
........................

இத்தகைய பிரச்சனையுள்ள ஒருவரும் நபி(ஸல்) காலத்தில் இருந்ததில்லை என்பதால் இதற்கு நேரடியான ஆதாரம் எதுவும் கிடைக்கவில்லை. ஆனாலும் இந்த பிரச்சனையுள்ளவர்கள் எப்படி அதை எடுத்துக் கொள்ள வேண்டும் என்பதற்கு நெருக்கமான ஆதாரம் கிடைப்பதால் அதை வைத்து இதை புரிந்துக் கொள்ளலாம்.

பாகம் 1, அத்தியாயம் 4, எண் 228
'அபூ ஹுபைஷ் என்பவரின் மகள் ஃபாத்திமா என்ற பெண், நபி(ஸல்) அவர்களிடம் வந்து, 'இறைத்தூதர் அவர்களே! நான் அதிகம் உதிரப்போக்குள்ள ஒரு பெண். நான் சுத்தமாவதில்லை. எனவே நான் தொழுகையைவிட்டு விடலாமா?' எனக் கேட்டதற்கு, 'இல்லை! அது ஒருவித நோயால் ஏற்படுவதாகும். அது மாதவிடாய் இரத்தமன்று. உனக்கு மாதவிடாய் வரும்போது தொழுகையைவிட்டு விடு; அது நின்றுவிட்டால் இரத்தம் பட்டு இடத்தைக் கழுவிவிட்டுத் தொழுகையை நிறைவேற்று' என்று இறைத்தூதர்(ஸல்) அவர்கள் கூறினார்கள். 'பின்னர் அடுத்த மாதவிடாய் வரும் வரை ஒவ்வொரு தொழுகைக்கும் நீ உளூச் செய்து கொள்' என்றும் நபி(ஸல்) அவர்கள் அப்பெண்ணிடம் கூறினார்கள்" என ஆயிஷா(ரலி) அறிவித்தார்.

அவ்வப்போது சிறுநீர் சொட்டுகள் வெளியேறுவது போன்ற ஒரு நிலையில் அன்றைக்கு தொடர் இரத்தப் போக்குக்கு ஆட்பட்டப் பெண் 'தொழுகையை விட்டு விடலாமா..' என்று கேட்கும் போது, 'தொழுகையை விட அனுமதியில்லை' என்று நபி(ஸல்) விளக்கியுள்ளார்கள். இதிலிருந்து சிறுநீர் சொட்டுகள் வெளியேறுபவர்கள் தொழுகையிலிருந்து விடுபட முடியாது என்பதை விளங்கலாம்.

சிறுநீரை விட அதிக துன்பமளிக்கக் கூடிய இரத்தப்போக்குள்ளவர்கள் கூட தொழுகையை விட அனுமதியில்லை என்பதை நாம் மிகுந்த கவனத்தில் கொள்ள வேண்டும்.

தொடர் இரத்தப் போக்கைப் பற்றி குறிப்பிடும் போது 'அது நரம்பு நோய்' என்று நபி(ஸல்) குறிப்பிட்டுள்ளார்கள்.

இயற்கைக்கு மாற்றமாக உடம்பில் நிகழும் எதுவோன்றும் நோயின் அடையாளமாகவே இருக்கும் என்பதால் அடிக்கடி சிறுநீர் சொட்டுகள் வெளியேறுவதையும் நாம் அதே அடிப்படையில் எடு்த்துக் கொள்ளலாம். மருத்துவம் செய்யும் அதே வேளையில் ஒவ்வொரு தொழுகைக்கும் அவர்கள் ஒளு செய்துக் கொள்ள வேண்டும்.

தொழுகையில் நிற்கும் போது அந்த நிலையை உணர்ந்தால் அவர்கள் தொழுகையை முறிக்க வேண்டும் என்கிற அவசியம் இல்லை. ஏனெனில் தீர்வே இந்த பிரச்சனைக்கு சொல்லப்பட்டதுதான்.

நமது கட்டுப்பாடுகளை கடந்து நடக்கும் காரியங்களுக்கு இறைவன் நம்மை குற்றம் பிடிக்க மாட்டான்.

கோவிலுக்கு போகும் இமாம்

ஓர் இமாம் கோவிலுக்கு சென்று விட்டு இமாமத்தும் செய்தால் அவர் பின்னால் தொழலாமா?

Name: முஹ்யித்தீன்
email: beekayemm@....
Location: U A E
Subject: Kelvi

அதீதக் கற்பனைகளுக்கெல்லாம் விடைத்தேடிக் கொண்டிருக்கக் கூடாது. 'முஸ்லிம் சகோதரர்களைப் பற்றி தவறான சிந்தனையிலிருந்து விலகிக் கொள்ளுங்கள். அவை பாவமாகி விடும்' என்பது குர்ஆன் நமக்கு சொல்லும் அறிவுரை.

நம்பிக்கையாளர்களே! (சந்தேகமான) பல எண்ணங்களிலிருந்து விலகிக் கொள்ளுங்கள்; ஏனெனில் நிச்சயமாக எண்ணங்களில் சில பாவங்களாக இருக்கும்; (பிறர் குறைகளை) நீங்கள் துருவித் துருவி ஆராய்ந்து கொண்டிராதீர்கள் (அல்குர்ஆன்)

பொதுவாகவே எந்த விஷயத்திலும் சந்தேகத்திற்கு இடங்கொடுக்கக் கூடாது என்றிருக்கும் போது இமாம்கள் கோவில்களுக்கு செல்வார்கள் என்ற சந்தேகம் ஏன் வருகின்றது?

கோவிலுக்கு சென்று சிலை வணக்கம் செய்யும் எவரும் பள்ளிவாசலுக்கு வந்து இமாமத் செய்ய மாட்டார்கள்.

ஒருவேளை அப்படி செய்தாலும் அவரைப் பின்பற்றித் தொழுவதால் நம்முடைய தொழுகை பாழ்பட்டுப் போகாது. இதற்கான வலுவான ஆதாரங்களை 'இணைவைக்கும் இமாமைப் பின்பற்றலாமா... என்ற கருத்துக்களத்தில் விரிவாக வைத்துள்ளோம்.

இணைவைக்கும் இமாம் கருத்துக்களம் செல்க.

பைஅத் - உடன்படிக்கை

நான் உங்கள் இணையத்தளத்தை கடந்த நான்கு ஆண்டுகளாக பார்த்து படித்து வருகிறேன். மிகவும் பயனுள்ள இணையமாக இருக்கின்றது.

எனக்கொரு கேள்வி.

பைஅத் பற்றியது பிறருடைய கைகளைப் பிடித்து நான் தினமும் ஐந்து முறைத் தொழுகிறேன்.. ஜக்காத் கொடுக்கிறேன் என்று சொல்வதற்கு குர்ஆன் சுன்னாவில் ஆதாரம் உள்ளதா..

யார் இதற்கு பணம் கொடுத்து யார் இயக்குகிறார்கள்?

Name: M.Mohamed Ali

email: m_hanifa_ali@.....

Location: Abu Dhabi

Subject: Question

இறைவனுக்கு செய்ய வேண்டிய வணக்கங்கள் -வழிபாடுகள் ஆகியவற்றிர்க்கு "அவற்றை தவறாமல் செய்கின்றேன்" நம்மைப் போன்ற மனிதர்களிடம் பைஅத் செய்வது எந்த வகையிலும் நியாயப்படுத்த முடியாத - முட்டாள்தனமான ஒன்றாகும்.

நாம் யாரிடம் பைஅத் செய்கின்றமோ அவரும் நம்மைப் போன்று நாம் செய்யும் கடமைகளை செய்யக் கடமைப்பட்டவராவார். நாம் அவரிடம் பைஅத் செய்ய வேண்டும் என்றால் அவர் யாரிடம் போய் பைஅத் செய்வார் என்ற கேள்வியை முன் வைத்தால் இந்த ஆன்மீக பைஅத் மோசடி விளங்கி விடும்.

'பைஅத்' என்றால் 'உடன்படிக்கை' என்று பொருள். உலகக் காரியங்களில் நமக்குள் நாம் பைஅத் செய்துக் கொள்ளலாம், செய்தும் கொள்கிறோம். இதுமட்டும் தான் அனுமதிக்கப்பட்டது. இதை கடந்த ஆன்மீக பைஅத் ஏமாற்று வேலையாகும்.

இது பற்றி மிக விரிவாக ஏற்கனவே எழுதியுள்ளோம்.

ஆதாரமற்ற ஆன்மீக பைஅத் செல்க

உலகில் எல்லாத்தரப்பினரும் ஏதோ காரணத்துக்காக வன்முறையில் ஈடுபடுகின்றனர். அதில் சில முஸ்லிம்களும் அடங்கத்தான் செய்வர். இந்த வன்முறையை ஊக்குவிக்க சிலரது பொருளாதாரமும் பயன்படத்தான் செய்யும். அவரகள் யார் என்று கண்டுபிடிப்பது அரசு சட்டத்துறையின் வேலையாகும்.

கப்ர் கூடாதா... ஆதாரம்?

கப்ர் வழிபாடு கூடாது என்பதற்கும், கப்ருக்களின் மீது கட்டிடம் கட்டக் கூடாது என்பதற்கும், பூசக்கூடாது என்பதற்கும் தடையுள்ள ஹதீஸ்களைக் கூறவும்.

Name: smdalikhan
email: smd_alikhan@.....
Location: DUBAI
Subject: Question

அவ்லியாக்களின் கபுர்களின் மீதுள்ள கட்டடங்களை தரைமட்டமாக்குவதற்கு நபி (ஸல்) அவர்கள் உத்தரவிட்டாகள்:-

ஹதீஸ் ஆதாரம்:- உயரமாக்கப்பட்ட எந்த கப்ரையும் தரைமட்டமாக்காமல் விடாதே என்று நபி (ஸல்) அவர்கள் எனக்குக் கட்டளையிட்டார்கள் என்று அலி (ரலி) அவர்கள் கூறினார்கள் அறிவிப்பவர்: அபுல் ஹய்யாஜ் அல் அஜதி (ரலி), நூல்கள் : அபூதாவுத், நஸயீ, திமிதி, அஹ்மத்.

அவ்லியாக்களின் கப்ருகளில் மஸ்ஜிதைக் கட்டுபவாகள் அல்லாஹ்வின் சாபத்திற்குரியவர்கள்:-ஹதீஸ் ஆதாரம்:-

யஹுதிகளையும், நஸாரக்களையும் அல்லாஹ் சபிப்பானாக. ஏனெனில் அவர்கள் தங்களின் நபிமார்கள் மற்றும் நல்லவர்களின் கபுகளை மஸ்ஜிதாக ஆக்கிக்கொண்டனர் (நூல் : புகாரி)

அவ்லியாக்களின் கபுர்களில் தர்ஹாக்களை எழுப்புபவர்கள் அல்லாஹ்வின் படைப்பினங்களிலேயே மிகவும் கெட்டவர்கள் ஆவாகள்:-ஹதீஸ் ஆதாரம்:-

அவர்களில் நல்ல மனிதர் ஒருவர் வாழ்ந்து மரணித்து விடும் போது அவரது கப்ரில் வணங்குமிடத்தை ஏற்படுத்தி விடுகின்றனர். இவாகளின் வடிவங்களையும் அதில் அமைத்து விடுகின்றனர். கியாம நாளில் அல்லாஹ்விடத்தில் அவர்கள்தான் படைப்பினங்களில் மிகவும் கெட்வர்கள் அறிவிப்பவர் : ஆயிஷா (ரலி), நூல் புகாரி மற்றும் முஸ்லிம்.

அவ்லியாக்களின் கபுர்களில் சந்தனம் போன்றவற்றைப் பூசக்கூடாது:-ஹதீஸ் ஆதாரம்-1:-

கப்ருகள் பூசப்படுவதை நபி (ஸல்) அவர்கள் தடுத்தனர் அறிவிப்பவர்: ஜாபிர் (ரலி), ஆதார நூல்கள் : அஹ்மத், முஸ்லிம், நஸயீ மற்றும் அபூதாவுத்.

ஹதீஸ் ஆதாரம்-2:-

கப்ருகள் பூசப்படுவதையும், அவற்றில் எதனையும் எழுதப்படுவதையும் அவற்றின் மீது கட்டடம் (தர்ஹா) எழுப்பப்படுவதையும் அல்லாஹ்வின் தூதர் (ஸல்) அவர்கள் தடுத்தனர் அறிவிப்பவர்: ஜாபி (ரலி), ஆதார நூல் : திமிதி.

அவ்லியாக்களின் கபுர்களில் கந்தூ விழாக்கள் நடத்தக்கூடாது:-ஹதீஸ் ஆதாரம்:-

எனது கப்ரை (கந்தூ) விழாக்கள் நடக்கும் இடமாக ஆக்கிவிடாதீகள். உங்கள் வீடுகளையும் கப்ருகளாக ஆக்கிவிடாதீகள். நீங்கள் எங்கிருந்த போதும் எனக்காக ஸலவாத்து சொல்லுங்கள். அது என்னை வந்தடையும் அறிவிப்பவர்: அபூஹுரைரா (ரலி), ஆதாரம்: அபூதாவுத்.

அவ்லியாக்களின் கபுர்களை வணங்கும் இடமாக ஆக்கக்கூடாது:-ஹதீஸ் ஆதாரம்-1 :-

யஹுதிகளும், நஸராக்களும் தங்கள் நபிமார்களின் கப்ரை வணங்குமிடங்களாக ஆக்கிக்கொண்டனர். அல்லாஹ் அவர்களைச் சபிப்பானாக அறிவிப்பவர்: அபூஹுரைரா (ரலி), நூல் : முஸ்லிம்.

ஹதீஸ் ஆதாரம்-2 :-

உங்களுக்கு முன்னர் வாழ்ந்தவர்கள் தங்கள் நபிமார்களின் கபுருகளையும், நல்லடியார்களின் கபுருகளையும் வணங்குமிடமாக ஆக்கிவிட்டனர். அறிந்து கொள்க! கபுருகளை வணங்குமிடமாக ஆக்கிவிடாதீகள்! அதை நான் தடுக்கிறேன் அறிவிப்பவர் : அப்துல்லாஹ் அல்பஜலி (ரலி), நூல் : முஸ்லிம்.

அண்ணன் மனைவி அண்ணியை..

அஸ்ஸலாமு அலைக்கும்(வரஹ்). அன்னிய பெண்களை இச்சை இல்லாமல் பார்கலாமா? அதே போன்று அண்ணனுடைய மனைவி, மாமாவுடைய மனைவி போன்றோர்களையும் இச்சை இல்லாமல் பார்க்கலாமா? அப்படி பார்க்க அனுமதி இல்லையெனில் யார் யாரை பார்க்க இஸ்லாம் அனுமதிக்கின்றது? இது பற்றி நமது மார்க்கம் என்ன கூறுகின்றது?

Name: Azeezudheen
email: skn.azeesudeen@....
Location: Dubai
Subject: Question
...............

நமக்கு உரிமையுள்ள மனைவியைத் தவிர வேறு எந்தப் பெண்ணையும் இச்சையுடன் பார்ப்பதற்கு இஸ்லாத்தில் அனுமதியில்லை.

இச்சையில்லாமல் பார்ப்பது என்பது பொதுவான அனுமதியாகும்.

அண்ணன், தம்பி மனைவிகள் விஷயத்தில் மிகுந்த எச்சரிக்கையுணர்வுடன் இருப்பது அவசியம்.

ஏனெனில்

முகம் கை தவிர மற்றப் பாகங்கள் முழுதும் மறைந்துள்ள நிலையில் பெண்கள் இருந்தால் அவர்களை தேவைக்காக பார்க்கலாம் என்ற அனுமதி அடங்கியுள்ள வசனம் கீழே!

முஃமினான பெண்களுக்கும் நீர் கூறுவீராக அவர்கள் தங்கள் பார்வைகளைத் தாழ்த்திக் கொள்ள வேண்டும்; தங்கள் வெட்கத் தலங்களைப் பேணிக்காத்துக் கொள்ள வேண்டும்; தங்கள் அழகை அதினின்று (சாதாரணமாக வெளியில்) தெரியக் கூடியதைத் தவிர (வேறு எதையும்) வெளிக் காட்டலாகாது இன்னும் தங்கள் முன்தானைகளால் தங்கள் மார்புகளை மறைத்துக் கொள்ள வேண்டும். (அல்குர்ஆன் 24:31)

வீடுகளில் இருக்கும் போது பெண்கள் சாதாரண உடைகளுடன் இருப்பார்கள். அது அவர்களின் உடலில் முகம் முன் கைகளைத் தவிர மற்றப்பாகங்களை மறைக்காத நிலையில இருந்தால் அவர்கள் மற்ற ஆண்களுக்கு மத்தியில் வெளிவரக் கூடாது. வெளிவரும் சூழ்நிலை ஏற்பட்டால் மறைத்த நிலையிலேயே வர வேண்டும். முகம், கைகளில் முற்பகுதி தெரியும் நிலையில் வெளிப்படலாம் என்பதிலிருந்தே ஆண்கள் அவசியத் தேவைக்காக பெண்களைப் பார்க்கலாம் என்பது விளங்குகின்றது.

வீட்டில் சாதாரணமாக வீட்டு உடைகளுடன் இருக்கும் போது யார் யார் முன்னிலையில் அந்த உடையுடன் வரலாம் என்பதையும் வசனம் தொடர்ந்து விளக்குகின்றது.

(முஃமினான பெண்கள்) தம் கணவர்கள்,

தம் தந்தையர்கள், (பெற்றத் தந்தை - வாப்பா, அத்தா, பெரியத்தா, சின்னத்தா)

தம் கணவர்களின் தந்தையர்கள் (மாமனார்கள், சின்ன பெரிய மாமனார்கள்)

தம் புதல்வர்கள் (மகன்கள்)

தம் கணவர்களின் புதல்வர்கள், (கணவருக்கு ஏற்கனவே திருமணமாகி ஆண் குந்தைகள் இருந்தால் அவர்கள்)

தம் சகோதரர்கள் (அண்ணன் தம்பிகள்)

தம் சகோதரர்களின் புதல்வர்கள், (அண்ணன் தம்பிகளின் மகன்கள்)

தம் சகோதரிகளின் புதல்வர்கள், (அக்காள் தங்கைகளின் மகன்கள்)

ஆடவர்களில் தம்மை அண்டி வாழும் (பெண்களை விரும்ப முடியாத அளவு வயதானவர்கள்) தளர்ந்து போன முதியவர்கள்.

பெண்களின் மறைவான அங்கங்களைப் பற்றி அறிந்து கொள்ளாத சிறுவர்கள் ஆகிய இவர்களைத் தவிர, (வேறு ஆண்களுக்குத்) தங்களுடைய அழகலங்காரத்தை வெளிப்படுத்தக் கூடாது. (அல்குர்ஆன் 24:31)

திருமணம் செய்ய தடுக்கப்பட்ட பெண்கள் ஆண்களுக்கு முன் சாதாரண உடையில் காட்சியளிக்கலாம். அதாவது மாமி, சின்னம்மா போன்றவர்கள் (திருமணம் செய்ய விலக்கப்பட்ட பெண்கள் யார் யார் என்பதை அல்குர்ஆன் 4:23 வசனத்தில் அறியலாம்.

சாதாரண உடையுடன் பார்வையில் படலாம் என்ற பட்டியலில் அண்ணிகள் (அண்ணன் - தம்பி மனைவிகள்) அடங்கவில்லை என்பதால் அவர்கள் முகம் முன்கைகள் தெரியும் நிலையில் மட்டுமே மச்சான்களிடம் (கணவரின் உடன் பிறந்த சகோதரர்களிடம்) இருக்க வேண்டும்.

பெண்களை சாதாரணமாக பார்க்க அனுமதியுள்ளது என்றால் முஃமினான ஆண்கள் தங்கள் பார்வையை தாழ்த்திக் கொள்ள வேண்டும் என்ற பொருள் அல்குர்ஆன் 24:30 வசனத்தின் பொருள் என்ன?

இங்கு பார்வையைத் தாழ்த்திக் கொள்ள வேண்டும் என்பது பெண்களை விட்டு பார்வையைத் தாழ்த்திக் கொள்ள வேண்டும் என்றக் கருத்தில் மட்டும் வரவில்லை. பொதுவாகவே தவறான - பாவமான அனைத்தையும் விட்டு பார்வையைத் தாழ்த்திக் கொள்ள வேண்டும் என்ற பொருளில் தான் வந்துள்ளது.

பார்வையில் பாவம் உருவாகும் நிலை இருந்தால் பெண்களை விட்டு பார்வையைத் திருப்பிக் கொள்ள வேண்டும்.

அரசு மானியம் பெறுவது ஹராமா...?

அஸ்ஸலாமு அலைக்கும். சிறுமான்மை நலத்திற்காக அரசின் சலுகைகளை பெற பொதுவாக போராடும் நாம், அரசு தரும் மானியங்களை, கடன் உதவிகளை பெறுவது கிடையாது. யாரும் தர மறுக்கும் பட்சத்தில், சிறுமான்மையினருக்காக ஒதுக்கப்படும் அரசின் கடனுதவித் திட்டங்கள் மற்றும் மானியங்களை பெறுவது ஹராமா? நான் பல வருடங்களாக வியாபரம் செய்து முன்னுக்கு வராமல் போனதற்கு எந்த பொருளாதால உதவிகளும் கிடைக்கமால் போனதுதான். ஆனால் அரசின் பல நல்ல திட்டங்களை பெற இது ஹராமாக இருக்குமோ என்கிற அச்சத்தில் விட்டு விட்டடேன். தயவு செய்து இது குறித்து விளக்கம் அளிக்கவும். அல்லாஹ் நல்லருள் புரிவானாக.

அன்புடன் பஃக்ருத்தீன்

Name: M.G. Fakrudeen

email: mgfakrudeen@...

Location: Riyadh

Subject: Question

..............................

அரசின் நல திட்டங்கள் உட்பட பெரும்பாலும் பொருளாதார வழிகாட்டல் நம் சமுதாயத்திற்கு இதுவரை கிடைக்கவில்லை. வணக்க வழிபாடுகளில் பிரச்சாரகர்கள் காட்டும் ஆர்வமும் அக்கறையும் பொருளாதார வழிகாட்டலில் காட்டுவதில்லை. இதற்கு காரணம் அவர்கள் கற்றக் கல்வி முறை என்றுக் கூட கூறலாம்.

அரசின் நல திட்டங்களில் முஸ்லிம்கள் பெருமளவு பங்கேற்க வேண்டும். ஏனெனில் அரசின் மக்கள் நல திட்டங்களில் பயன்படுத்தப்படும் தொகை மக்களின் வரிப்பணமாகும்.

நம்மிடமிருந்து பெற்றத் தொகையை அரசு வேறொரு திட்டத்திற்காக நம்மிடம் வழங்கும் போது அதை புறக்கணிப்பது நமது தொகையை நாமே புறக்கணி்ப்பதற்கு சமமாகி விடும்.

இப்போதுள்ள கேள்வி, அரசின் நல திட்டங்களுக்காக அரசு வழங்கும் கடன் தொகை என்பது வட்டியை அடிப்படையாகக் கொண்டதாகும். கடன் பெற்றால் அதற்கு வட்டி செலுத்தும் நிலை ஏற்படுவதால் அரசின் நல திட்டங்களில் பங்கேற்க முடியுமா.. என்பதாகும்.

இதற்கு விடைக் காண்பதற்கு அரசி்ன் நல திட்டங்களின் விதிகள் குறித்த அறிவு நமக்கு இருக்க வேண்டும்.

அரசு தொழில் கடனுக்காக ஒதுக்கும் மானியம் என்பது நமது வரிப் பணம் என்பதை முதலில் கவனத்தில் கொள்ளும் அதே வேலை கடன் தொகை அரசால் தள்ளுப்படி செய்யும் நிலையும் அவ்வப்போது ஏற்படுகின்றது.

பணம் கொடுத்துப் பணம் பெறுவது வட்டி என்பதில் மாற்றுக் கருத்து இருக்க முடியாது என்பதால் அரசிடம் இருந்து பணம் பெற்று அதற்கு மேதலிக பணம் கொடுப்பது வட்டி என்று அஞ்சுபவர்கள் அரசின் தொழில் மற்றும் விவசாய திட்டங்களில் பங்கேற்கலாம்.

பணமாக பெறாமல் தொழில் கருவிகளாகவோ விவசாய நிலங்களாகவோ பெறுபவர்கள் அதிலிருந்து அரசுக்கு கொடுக்கும் தொகை வட்டியில் அடங்குமா என்றால் திட்டமாக அவற்றை வட்டி என்று சொல்ல முடியாது. ஏனெனில் பணம் பொருளாக மாறும் போது அது வட்டியின் தரத்தை இழக்கின்றது.

உதாரணமாக வயலில் உழுவதற்கு ஒரு டிராக்டரை அரசிடமிருந்து பெறுபவர் அதற்காக அரசுக்கு மாதந்தோரும் ஒரு தொகை செலுத்துகிறார் என்றால் அது இஸ்லாமியப் பார்வையில் அது பொருளுக்கான வாடகையாகவோ, அல்லது லாபத்தில் குறைந்த ஒதுக்கீடாவோதான் அது அமையும்.

வட்டி என்ற பெயரில் இன்றைக்கு இருக்கும் திட்டங்கள் அனைத்தும் இஸ்லாமியப் பார்வையில் வட்டியாகுமா என்பது ஆய்வுக்குரியதாகும்.

தங்கத்திலே ஒரு குறை

முஸ்லிம் ஆண்கள் தங்கம் அணிவதற்கு ஏன் அனுமதியில்லை. மாற்றுமத சகோதரர் இதைப்பற்றி என்னிடம் கேட்கிறார். தெளிவாக விளக்கவும்.

Name: Syed Mansoor
email: alshifas@...
Location: Abu Dhabi
Subject: Question
...................

ஆண்களுக்கு தங்கம் ஹராம் என்று இறைத்தூதர் தடுத்தது உண்மைதான். எல்லா நிலைகளிலும் ஆண் ஆணாகவும் - பெண் பெண்ணாகவும் இருக்க வேண்டும் என்ற இயல்பை இஸ்லாம் விரும்புகின்றது. நடை - உடை - பாவனை - பேச்சு - செயல்பாடு என்ற அனைத்திலும் ஆண்களுக்கும் பெண்களுக்கும் வித்தியாசம் இருக்க வேண்டும்.

பெண்ணை பெண் என்று எடுத்துக் காட்டும் உடைகளை ஆண்களோ, ஆண்களை அடையளாப்படுத்தும் உடைகளைப் பெண்களோ அணியக் கூடாது என்றும் இஸ்லாம் சொல்லியுள்ளது.

அதே போன்று தான் அணிகலன்களும். தங்கம் என்பது பொதுவாக, காலாகாலமாக, பெண்களுக்கான ஆபரணம் என்று வழக்கில் உள்ளது. தங்க நகை அணியும் போது ஒரு பெண் கூடுதல் அழகைப் பெறுகிறாள். அவளுக்கென்று, அவள் அழகை மேம்படுத்தும் ஆபரணமாக இருப்பதை ஆணும் தனக்காக்கிக் கொள்ளக் கூடாது என்ற கருத்து இதில் அடங்கி இருக்கலாம். ஆண் தங்கம் அணிவதால் அவன் அழகு மேம்படப் போவதில்லை. அது வெறும் 'பந்தா' தோரணையை மட்டுமே ஏற்படுத்தும்.

மைனர் சைன் என்று போட்டுக் கொள்ளும் சிலர் தங்கள் சட்டையின் சில பொத்தான்களை திறந்து விட்டுக் கொண்டு, தெருக்களில் பெண்களுக்கு முன்னால் உலவுவதைப் பார்க்கலாம். ஆண்கள் தங்கம் அணிவது இத்தகைய செயல்களுக்கு மட்டுமே வழிவகுக்கும்.

தேவைக்கு ஆண்கள் தங்கம் அணிவதை இஸ்லாம் தடுக்கவில்லை. உடைந்துப் போன, அல்லது பிடுங்கி எடுத்த பற்களுக்கு பதிலாக இன்றைக்கு நவீன சிகிட்சை முறை பிரபல்யமாகி புதிய செயற்கைப் பற்கள் வந்து விட்டன. ஒரு காலத்தில் பற்களுக்கு தங்கத்தைப் பயன்படுத்தி வந்தனர். அத்தகைய தேவைக்கா ஆண் தங்கத்தைப் பயன்படுத்தினால் தடையில்லை. நவீன அறுவை சிகிட்சையில் இன்றைக்கு பொருத்தப்படும் உடல் உறுப்புகள் போன்ற வளர்ச்சியில்லாத காலத்தில் போரில் மூக்கு வெட்டப்பட்ட ஒருவர் தங்கத்தால் மூக்கை வடிவமைத்துக் கொண்டார் அதை இறைத்தூதர் அனுமதித்தார்கள்.

சிறிய அளவிளான இத்தகைய தங்கங்களை தேவைக்கேற்ப ஆண்கள் பயன்படுத்திக் கொள்ளலாம்.

தங்கம் - பட்டு - வெள்ளிப் போன்றவை பெண்கள் பிரத்யேகமாக பயன்படுத்துபவையாகும். அதில் ஆண்கள் போட்டிப் போடக் கூடாது என்பதால் அவை ஆண்களுக்கு தடுக்கப்பட்டிருக்கலாம். ஆரம்ப வரிகளைப் படியுங்கள். "ஆண் ஆணாகவும், பெண் பெண்ணாகவும் (எல்லா நிலைகளிலும்) இருக்க வேண்டும் என்று இஸஸ்லாம் விரும்புவதைப் புரிந்துக் கொண்டால் இந்தத் தடைக்காண அர்த்தம் புரிந்து விடும்.

இந்த விருந்துக்கு செல்லலாமா..?

அஸ்ஸலாமு அலைக்கும். "விருந்துக்காக அழைப்பவரின் அழைப்பை ஏற்றுக் கொள்வது" நபி (ஸல்) அவர்கள் நமக்கு காட்டிதந்த வழிமுறையாகும். ஆனால் ஒருவரது வருமானம் ஹராமான முறையில் பெறப்பட்டதாக இருக்கும்போது அவருடைய அழைப்பை ஏற்றுகொள்ளலாமா?

Name: Azeezudheen
email: skn_azeesudeen@....
Location: Dubai
Subject: Kelvi

அனுமதிக்கப்பட்ட ஒரு பொருளை ஒருவர் ஹராமான வழியில் பெறுகிறார் அதை அவர் பிறருக்கு கொடுக்கிறார் என்றால் அதைப் பெற்றுக் கொள்வதற்கு மார்க்கத்தில் தடையொன்றும் இல்லை.

பணம் என்பது ஹலாலான ஒன்று. அதை லஞ்சமாக பெற்ற ஒருவர் தன் குடும்பத்திற்காக செலவு செய்கிறார் அல்லது நற்பணிகளுக்கு கொடுக்கிறார் என்றால் லஞ்சம் பெற்றதற்கு அவர் குற்றவாளியாவாரே தவிர அவரிடமிருந்து அதைப் பெற்றுக் கொள்ளும் எவரும் மார்க்கம் அனுமதிக்கப்பட்டவழியில் அதைப் பெறுவதால் அவர்களுக்கு அது ஹராமாகாது.

நபி(ஸல்) அவர்கள் தனக்கும் தன் குடும்பத்தாருக்கும் தர்மப் பொருளை ஹராமாக்கிக் கொண்டார்கள். ஹலாலான பொருளை ஒருவர் தரமமாக நபி(ஸல்) அவர்களுக்கு வழங்கினால் அது அவர்களுக்கு ஹராமாகும்.

பாகம் 3, அத்தியாயம் 50, எண் 2576

அல்லாஹ்வின் தூதரிடம் உணவுப் பொருள் கொண்டு வரும் போது இது அன்பளிப்பா? தருமமா? என்று அவர்கள் கேட்பார்கள். தருமம் தான் என்று பதிலளிக்கப்பட்டால் தம் தோழர்களிடம், நீங்கள் உண்ணுங்கள் என்று கூறிவிடுவார்.

.............................

இதை கவனத்தில் கொண்டு கீழுள்ள நபிமொழியைப் பாருங்கள்.

பாகம் 2, அத்தியாயம் 24,எண் 1495 அனஸ்(ரலி) அறிவித்தார்.

தர்மமாகக் கொடுக்கப்பட்ட இறைச்சி நபி(ஸல்) அவர்களிடம் கொண்டு வரப்பட்டது. அப்போது அவர்கள் இது பரீராவுக்குத் தர்மமாகும்; ஆனால் நமக்கு அன்பளிப்பாகும்' என்றார்கள்.

...........................

பாகம் 6, அத்தியாயம் 68, எண் 5279

பாத்திரம் ஒன்றில் இறைச்சி கொதித்துக் கொண்டிருந்த நிலையில் இறைத்தூதர்(ஸல்) அவர்கள் (வீட்டுக்குள்) நுழைந்தார்கள். அப்போது அவர்களுக்கு முன் ரொட்டியும் வீட்டிலிருந்த குழம்பும் வைக்கப்பட்டது. அப்போது அவர்கள் 'பாத்திரத்தில் இறைச்சி இருக்கக் கண்டேனே! (அது என்னவாயிற்று?)' என்று கேட்டார்கள். அதற்குக் குடும்பத்தார் 'ஆம்! (இருக்கிறது)ஆனால், அது பரீராவுக்கு தர்மமாக வழங்கப்பட்டதாகும். தாங்கள் தாம் தர்மப் பொருட்களைச் சாப்பிடமாட்டீர்களே?' என்று கூறினர். அப்போது நபி(ஸல்) அவர்கள் 'அது பரீராவுக்குத்தான் தர்மம்; நமக்கு அது (பரீராவிடமிருந்து) அன்பளிப்பு' என்றார்கள்.

....................

பரீரா என்ற நபித்தோழியருக்கு ஆட்டிறைச்சி தர்மமாக கிடைக்கின்றது. தர்மம் என்ற நிலையில் அது பரீராவுக்கு ஹலாலாகவும் நபி(ஸல்) அவர்களுக்கு ஹராமாகவும் இருந்தது. தனக்கு கிடைத்த தர்மத்தை பரீரா நபி(ஸல்) அவர்களுக்கு அன்பளிப்பாக கொடுக்கின்றார். அதை நபி(ஸல்) பெற்றுக் கொண்டு (பிறருக்கு விளக்கமளித்து விட்டு) உண்கிறார்கள்.

இதிலிருந்து நமக்கு கிடைக்கும் வழி அனுமதிக்கப்பட்ட வழியா என்பதை மட்டும் பார்த்து விருந்தையோ - இதர எதுவொன்றையோ பெற்றுக் கொள்ளலாம் என்பதை விளங்கலாம்.

இதை இன்னும் சற்று விளக்கமாக சொல்வதென்றால் யுதர்கள் பற்றிய விளக்கத்தை நாம் எடுத்துக் கொள்ளலாம்.

யுதர்கள் மீது வட்டி ஹராமாக்கப்பட்டது ஆனால் அவர்கள் அதை பொருட்படுத்தாமல் வட்டியில் மூழ்கினார்கள்.

وَأَخْذِهِمُ الرِّبَا وَقَدْ نُهُواْ عَنْهُ وَأَكْلِهِمْ أَمْوَالَ النَّاسِ بِالْبَاطِلِ وَأَعْتَدْنَا لِلْكَافِرِينَ مِنْهُمْ عَذَابًا أَلِيمًا

வட்டி வாங்குவது அவர்களுக்குத் தடை செய்யப்பட்டிருந்தும், அவர்கள் அதை வாங்கி வந்ததன் (காரணமாகவும்,) தவறான முறையில் அவர்கள் மக்களின் சொத்துகளை விழுங்கிக் கொண்டிருந்ததன் (காரணமாகவும், இவ்வாறு தண்டனை வழங்கினோம்), இவர்களில் காஃபிரானோருக்கு (மறுமையில்) நோவினை செய்யும் வேதனையையும் நாம் சித்தப்படுத்தியுள்ளோம் (அல் குர்ஆன் 4:161)

பாகம் 2, அத்தியாயம் 34, எண் 2224

இறைத்தூதர்(ஸல்) அவர்கள் கூறினார்கள்'
'யூதர்களை அல்லாஹ் சபிப்பானாக! அவர்களுக்குக் கொழுப்பு ஹராமாக்கப்பட்டபோது அதைவிற்று அதன் கிரயத்தை அவர்கள் சாப்பிட்டார்கள்.' என அபூ ஹுரைரா(ரலி) அறிவிக்கிறார்கள்.

யுதர்களைப் பொருத்தவரை அவர்களின் வருமானம் ஹராமான வழியில் இருந்தது என்பதற்கு இந்த வசனமும் நபிமொழியும் சான்றாக உள்ளது.

இவர்களோடு நமக்குள்ள உறவைப் பற்றி குர்ஆன் குறிப்பிடும் போது,

وَطَعَامُ الَّذِينَ أُوتُواْ الْكِتَابَ حِلٌّ لَّكُمْ
வேதம் கொடுக்கப்பட்டோரின் உணவும் உங்களுக்கு ஹலாலானதே. (அல்குர்ஆன் 5:5) என்று குறிப்பிடுகின்றது. வேதக்காரர்களில் முக்கியமானவர்களாக கருதப்படுபவர்களைப் பற்றி குர்ஆன் 'அவர்களின் வருமானம் ஹராமான வழியில் இருந்தது' என்று கூறிவிட்டு அவர்களின் உணவு உங்களுக்கு ஹலால் என்றும் குறிப்பிடுகின்றது.

இதிலிருந்து நமக்கு வரும் வழி அனுமதிக்கப்பட்ட வழியாக இருந்தால் நாம் சாப்பிடலாம் பெற்றுக் கொள்ளலாம் என்பதை விளங்க முடிகின்றது.

எனவே ஹராமான வழியில் பொருள் திரட்டுபவர்கள் நம்மை விருந்துக்கு அழைத்தால் அதில் கலந்துக் கொள்வது பற்றி தடையொன்றும் இல்லை. அதே நேரம் அவர்களின் தவறை சுட்டிக்காட்டும் கடமையும் நமக்கு இருக்கின்றது என்பதை மறந்து விடக் கூடாது.

அல்லாஹ் மிக்க அறிந்தவன்